«Խաղ իմ կանոններով» ֆիլմն արդեն ցուցադրվում է էկրաններին: Ֆիլմի հերոսուհիներից մեկին՝ Անիին, մարմնավորող Լիա Զախարյանը՝ խոսելով այս ֆիլմի մասին, ասաց, որ շատ ուրախ է այստեղ նկարահանվելու համար և մեծ հաճույքով կրկին կաշխատի ստեղծագործական ու դերասանական կազմի հետ:

«Հիմա, երբ նայում եմ ֆիլմը, ինձ մոտ տպավորություն է, որ մյուս հերոսների, փոքր, չարաճճի, սիրահարված քույրիկն եմ,- ասաց Լիան և նշեց կերպարի  հետ ընդհանրությունները,- Ես  էլ եմ բնավորությամբ ակտիվ, արկածախնդիր, ռոմանտիկ մտքեր ունեմ, ուղղակի այդ չափից դուրս միամտությունը չունեմ ու իրական կյանքում չեմ զգացել այն անկեղծ սերը, որը խաղում եմ ֆիլմում»:

Լիայի խոսքով՝ երբևէ չի ստել հանուն սիրելիի, ոչ էլ իրական կյանքում սիրո համար լացել  է հերսոսուհու պես, փորձել ամեն գնով պահել սիրելիին. «Հուսամ՝ կզգամ, կապ չունի նա կլինի Հայաստանից, թե՝ Իտալիայից եկած ինչ-որ մեկը»: Ըստ Լիայի՝ իր հերոսուհին միայն ֆիլմի սկզբում էր զուտ ամուսնանալու նպատակ հետապնդում, մեկ-երկու օր անցկացնելով Իտալիայից ժամանած  թեկնածուի հետ, նա իսկապես սկսում է սիրել այդ տղային:

Սա առաջին ֆիլմն էր, որում նկարահանվել է Լիան: «Սերիալում հնարավոր է առաջին տասը սերիայում դեռ չլինես կերպարիդ մեջ, հետո արդեն սկսես նոր երանգներով մատուցել կերպարդ: Ֆիլմում ժամանակը սուղ է,  պետք է կարողանաս 2 ժամում ճիշտ ներկայացնել հերոսիդ: Բնականաբար, մինչ նկարահանումներ սկսելը փորձել ենք մտնել կերպարի մեջ, խաղացել ենք, «չիտկա» ենք արել, որպեսզի ստանանք այն, ինչ պետք է,- խոսելով սերիալի և ֆիլմի տարբերությունների մասին՝ ասաց Լիան և հավելեց, որ իրեն դուր է եկել ֆիլմի վերջնական տարբերակը: -Թեթև, դրական, հումորային ֆիլմ է: Կա և՛ հումոր, և՛ սեր, և՛ դաստեարակչական բնույթ այն առումով, որ պետք չէ խաղալ սիրո հետ»:

Լիայի փոխանցմամբ՝ Աբել Աբելյանի հետ կներկայանա Սունդուկյան թատրոնում ապրիլին կամ մայիսին կայանալիք ներկայացման շրջանակներում՝ որպես դպրոց-ստուդիայի լավագույն սաներից մեկը, բացի այդ, կխաղա նաև կարճամետրաժ մի ֆիլմում. «Կփորձեմ նոր կերպարով ներկայանալ հանրությանը, որպեսզի մարդիկ տեսնեն, որ կարող եմ ոչ միայն կատակերգական, աշխույժ կերպարներ մարմնավորել»:

Այս պահին Լիան մշտական աշխատանք չունի, քանի որ սերիալներ քիչ են նկարահանվում. «Այժմ մեզ մոտ սերիալների պակաս կա: Այն հեռուստաընկերությունը, որտեղ աշխատում էի, դեռ չի նկարահանում նոր սերիալ, կաշխատեմ գեղարվեստական ֆիլմերում, իսկ սերիալում կնկարահանվեմ՝  հարմար առաջարկ ստանալու դեպքում»:

(Մանուել), ArmLur.ru