ՀՀ վարչապետը հրաժարական է տվել: Այս մասին լրագրողներին ասաց ՀՀԿ մամուլի խոսնակ Էդուարդ Շարմազանովը` ՀՀԿ գործադիր մարմնի նիստից հետո: Շարմազանովը հայտնեց, որ ՀՀ վարչապետ Տիգրան Սարգասյանն այսօր ներկայացրել է հրաժարականի դիմում, որն ընդունվել է ՀՀ Նախգահի կողմից:
«Դեռևս մեկ ամիս առաջ նա նման խնդրանքով դիմել է Նախագահին, սակայն հաշվի առնելով հանգամանքը, որ կուտակային կենսաթոշակների հարցը պետք է քննվեր ՍԴ-ում, Նախագահը խնդրել էր շարունակել պաշտոնավարումը, և այսօր արդեն նրա դիմումը բավարարվել է»:
Վարչապետը նշել է, որ սա կշռադատված որոշում է, այլ ոչ` պահի տակ կայացված: Էդուարդ Շարամազանովի խոսքով՝ սա անձնական որոշում է:
20.47
Քիչ ավելի ուշ Տիգրան Սարգսյանն իր ֆեյսբուքյան էջում գրել է.
«Սիրելի հայրենակիցներ,
Դեռևս փետրվար ամսին ես հանրապետության Նախագահ Սերժ Սարգսյանին դիմեցի խնդրանքով՝ ընդունել իմ հրաժարականը: Որոշումս հասունացած էր և խորը գիտակցված:
Պայմանավորվեցինք դիմումի ներկայացման պահը հետաձգել`մի շարք կարևոր պետական միջոցառումների և ՀՀԿ տնտեսական համաժողովի անցկացման անհրաժեշտությունից ելնելով:
Իմ շնորհակալությունն եմ հայտնում բոլոր այն մարդկանց, ում հետ աշխատել եմ, և առաջին հերթին՝ հանրապեության Նախագահին՝ վարչապետի բարձր պաշտոնն ինձ վստահելու համար:
Նոր Կառավարությանը մաղթում եմ հայրենանվեր և արդյունավետ աշխատանք»:
20.54
ՀՀԿ խոսնակի ներկայացմամբ՝ նոր վարչապետի և Կառավարության հարցը ԳՄ նիստում չի քննարկվել, որովհետև ըստ Սահամանադրության՝ ՀՀ Նախագահը պետք է կոնսուլտացիաներ անցկացնի քաղաքական մեծամասնության և Ազգային ժողովում ներկայացված խմբակցությունների հետ: Դրանից հետո միայն, օգտվելով իր սահմանադրական լիազորություններից, ՀՀ Նախագահը կնշանակի վարչապետ և նոր Կառավարություն:
Հարցին, թե արդյո՞ք վարչապետի որոշումը պայմանավորված է Հայաստանի՝ ՄՄ-ին անդամակցությամբ, Էդուարդ Շարմազանովը պատասխանեց. «Իհարկե՝ ո´չ, որովհետև ՄՄ-ին անդամակցելը քաղաքական որոշում էր,և մենք կարծում ենք, որ ընդունված և նախատեսված ժամկետներում Հայաստանը կանդամակցի ՄՄ-ին»,-ասաց նա:
Վերջինս նաև վստահեցրեց, որ վարչապետի հրաժարականն ընդդիմության նախաձեռնած անվստահության գործընթացի և ընդդիմության օրակարգի հետ ընդանրապես կապ չունի: Ընդդիմությունն ունի իր օրակարգը:
Tert.am
Արման٠Հարությունյան, ArmLur.ru |
